حوار بين اتنين مدرسين

[mr fahmy]

السبت,حزيران 28, 2008

حوار بين اتنين مدرسين

من مدونة ابحار لفهمي إبراهيم

- عايز تاخد الكادر

## طبعا حد طايل ##

- ليه طبعا

## عشان أعيش ##

- ليه هو أنت مش عايش

## برضه الكادر بيدي الواحد هيبه ##

- يابني الكادر ده مش فلوس وبس

## يعني إيه ##

- يعني شغل وبحث وتطوير وإطلاع

## دا الواحد بيعمل البدع في الفصل عشان العيال تفهم ##

- إن شاء الله الوزارة حتخليك تعمل أراجوز !.. وعجين الفلاحة كمان!

## دانا أعمل عجين الفلاحة .. !

والمتحضرة .. ! والهانم ..!

وهيلاري كلينتون ..! وعجين أوباما كمان..!!

بس وحياة أبوك بلاش كونداليزا رايس##

- ليه ؟؟

## عشان العيش مايتحرقش .. مش كفاية دم الواحد محروق خلقة ##

- انت عارف لوحتسقط في الامتحان حيعملوا فيك إيه ؟؟

## حيعملوا إيه يعني .. ما احنا ياما اتعمل فينا من الوزارة ومن الوزراء السابقين
وإن شاء الله من اللاحقين برضُه ومن الطلبة و من أولياء الامور
و من عم محمد البقال والجزار اللي ما بحبش أفتكر إسمه##


- عارف ..اللي حيسقط في اللغة العربية , حيوقفوه في الطابور لبعد الفسحة
تحت الصاري بتاع العلم

## عشان الطلبة تحييه ##
- تحييه إيه يابني .. دا عشان الطلبة تتفرج عليه وتعرف إنه ما بيعرفش عربي

## يعني ما بيعرفش يتكلم .. قصدك ما بيعرفش يشرح ..

طيب لو سقط في الكفاءة والتربوي ..حيعملوا فيه إيه ؟ ##

- حايوقفوه في الطابور برضة لغاية الفسحة ..

وبعدين حيلففوه أرض الطابور .. لحد مايقع مغشيا علية

ومش حيجيبوا له الإسعاف ..!!عشان عدد المدرسين يقل..!

## يانهار أسود طيب لو سقط بالتلاتة..... قصدي في مادة تخصصه ؟ ##

- ده بقي.. حيبقي عبرة العبر

## إزاي ؟؟ ##

- الوزير يابني حيخليه مستريح .. وحيجيله لحده.. وفي مدرستة كمان !!!

## ده يبقي تكريم بقي ##

- لأ.. ده حياخد عشرة من الطلبة اللي بيعيدو السنة.. إللي راسبين يعني..

ويدي كل واحد منهم خرزانة !!! وحينقوا الطلبة إللي راسبين للمرة التانية

## عشان إيه كل ده ##

- عشان يمدوا المدرس الراسب علي رجلية قدام الطلبة..ومش كده وبس !!

دا حيصوروه فيديو .. و يجيبوه عالهواء مباشرةً ..نقل مباشر
زى الأهلي والزمالك كده
## يانهار أسود ..دي تبقي فضيحة بجلاجل ياجدعان ##

- برضه كل دة بعد الفسحة

##قصدك يعني بعد مايقف زي اللي سقط في الكفاءة لحد الفسحة ..

والطلبة تعرف انة سقط بالتلاتة ##

- بالظبط 000
## طب افرض المدرس ده عنده روماتيزم في رجليه .. أو عنده دوالي ..

أو مابيقدرش يسند طوله .. لا قدَّر الله ؟؟ ##

- ده بقي حياخد حقه بالتمام والكمال .. الحكاية ما فيهاش خيار وفقوس ! ## قصدك إيه ##

- قصدي إن كل واحد حياخد حقه كامل برضو ..
بس حياخده علي قفاه ..!!

##لا ياعم الوزير بتاعنا طيب وحيساعدنا ..

وحيسد .. ويشيل عننا .. ده جمل يابني ! يعني حمَّال أسيه
وممكن يعمل مش واخد باله .. عشان ننجح بنسبة 99%

عشان الأكاديمية تمشى وتستمر..

والشغل اللي فيها يحلو.. وعشان إحنا مانتكلمش ... لازم حيراعينا ##

- حيراعيك إيه يابني ده امتحان !!

## هو فيه اكبرمن الامتحان اللي احنا فيه ده..

ياخوفي ليكون عايز يعملها بجد ##

- أُمَّال هزار
##علي كده العدد حيبقي محدود جدا .. لأن كله حيسقط

وينكشف ويبان المستور يا عبد الستار

ويبان المداري ياعبد الباري ##

- طبعا !! انت بتفتكرها لعبة
## عموما أنا حاخد دروس خصوصية من دلوقتي عشان اجيب مجموع100%

وعرفت كمان انهم حيعملوا مذكرات ##

- طب والنبي تقولي حيبيعوها في أنهي مكتبة ؟؟؟ وبكام ؟؟؟
## لا دي حتبقي دكاكيني عشان اللي حيظبطوه حيودوه محافظة غير محافظته ##

- ده كان زمان يا حبيبي

## امال حيودوه فين ##

- حايحبسوه في أوضة الفيران

## أوضة الفيران بتاعة مدرسته؟؟ ##

- لأ .. اوضة الفيران بتاعة المدرسة اللي جنبهم
## ليه ##

- لان الفيران بتاعة مدرسته واخدة عليه
ومن باب العشرة والعيش والملح مش حتعمل معاه حاجة !!!



Mr Fahmy

الإسكندرية