ننقل إليكم "نفاق للركب" على القناة الأولى!!!

[M I D O]

بسم الله الرحمن الرحيم

لو كده نراجع تاريخ الإذاعة التليفزيونية المصرية هنعرف إن جهاز التلفزيون أنشئ فى أواخر الخمسينات بقرار من الرئيس الراحل جمال عبد الناصر، و كان وقتها أول دولة فى قارة أفريقيا و فى العالم العربى و كمان فى العالم الإسلامى اللى تعمل تلفزيون! و لو نراجع تاريخنا هنعرف إن الدول العربية الشقيقة كانت بتعمل محطات تقوية إشارات على طول حدودها مع مصر علشان تستقبل إشارات الـ UHF بتاعت التليفزيون المصرى و تقويها و تعيد إرسالها إلى مواطنيها، و ده طبعا من قبل إستخدام الأقمار الصناعية على النطاق التجارى!

المشكلة مش فى كده خالص، بس المشكلة فى كمية النفاق و الهبل و التخلف اللى بيطلع من التلفزيون المصرى من يوم ما وعيت على الدنيا لحد النهاردة، يعنى مثلا إيه هأقولكم على مثال بس ياليت ماحدش يفهمنى غلط! و أنت بتتفرج كده على فيلم ظريف على القناة الأولى (ده لو عرفوا يجيبوا فيلم ظريف يعنى!) و هوب تييجى صلاة العصر و تبقى الدنيا حواليك بتتررج من اصوات آذان العصر (و اللى اتكلمت عن المشكلة دى قبل كده) تلاقيهم بكل بساطة قطعوا الفيلم و يذيعوا فقرة آذان بصوت شيخ من شيوخنا الأجلاء، أنا ماعنديش مشكلة فى الحتة دى خالص و مش معترض لحد دلوقتى! بس بقى افرض إن فى ماتش كورة بيتذاع و الماتش حامى قوى و الفريقتين عمالين يحدفوا الكورة يمين و شمال بلا مبرر، و هوب آذان العصر يأذن حواليك و برضه يررجرج الدنيا حواليك تلاقى القناة الأولى بكل خيابة و تفاهة و حقارة كاتبين فى الشريط اللى تحت (حان الآن آذان العصر) يا سلام! ::mad

صلى على النبى، فكرة إدخال فقرات آذان بصوت شيخ من الشيوخ أساسًا كانت فكرة أيام السادات، و أنا مأعرفش يعنى من الإيمان بتاعه يعنى يفكر فى فكرة غير مبررة زى كده! و قبل كده فى التليفزيون المصرى كان الآذان عبارة عن شريط أو لقطة ثابتة مجرد أنها بتنبه المتفرج إن فى آذان شغال و الصلاة قامت و خلاص! بس إنهم بقى يعملوا فقرة مدتها أكتر من 4 دقائق آذان أنا شايف إنها فكرة مبالغ فيها شوية، و هأقولكم ليه: يعنى السعودية حاضنة الكعبة و حامى حمى مناسك الحج و العمرة مافيش فى قنواتها آذان بيتذاع بالطريقة دى! اللهم إلا فى رمضان بيجيبوا شوية لقطات من الحرم المكى أو المسجد النبوى و ده برضه عادى و طبيعى جدًا!

و اللى غايظنى أكتر إيه، يقوموا يذيعوا الآذان فى أى حاجة بتتعرض إلا عند حاجتين:
- ماتش كورة
- بث أو حوار مع الرئيس المعظم رئيس مصر و الحوارى المجاورة

يعنى بذمتكم ده مش نفاق؟ ::thk ده مش استخفاف بيكم احنا يا مصريين؟!!! دى مش إهانة للآذان اللى مفروض إنه إعلان علشان خمس دقائق تقفهم قدام ربنا بذمة شوية؟ فى ناس تفتكر إنى علمانى، آه، أنا فى فترة من فترات حياتى كنت علمانى، بس دلوقتى الحمد لله ربنا هادانى و بأحاول أمسك العصاية من النص و بقيت قريب من الفكر التقدمى، و لا أعترض أبدًا على دخول الدين فى حياتنا اليومية أو الإجتماعية و لا الكلام ده، بس أن بس معترض على النفاق فى كل حاجة حتى فى الدين!

منتظر رأيكم