كل سنة وأنتِ طيبة يا مصر

[أ/رضا عطيه]

رمضان زكى معتوق يكتب:

كل سنة وأنتِ طيبة يا مصر



الحمد لله على سلامتك يا مصر شدة وزالت يا حبيبتى وغمة وانزاحت يا بلدى،

سنة جديدة يا حلوة وأنا مازلت على عهدى معاك وبطمنك كمان وكمان حتى ترجعى مصر بهية العفية الذكية النقية التقية الأبية.

عارف إن اللى فات كان كابوس مؤلم لكن خلاص ولا يهمك المهم إنك باقية زى مانت عالية ولقلوبنا غالية ولهمومنا شايله

لأنك عنيدة شديدة مجيدة رشيدة فريدة.

وكل سنة هقولك يا بلدى ماتزعليش لأن السنادى أحلى واللى جاى أحلى

وإحنا على عهدك محافظين ولترابك صاينين وفى طريقك مكملين،

كل سنة يا بلدى وأنتى أجمل وأرقى وأنقى وأتقى وأذكى وأطيب وأفضل وأعظم وطن.

بنلف بلاد يا بلدى ونعدى بحور ومهما نلف ومهما ندور بنرجع لحضنك الدافى وجوك الصافى وخيرك الكافى وقلبك الوافى وليلك الخافى، ربنا معاكى حاميكى من كل غادر فربك هو الشافى المعافى،

كل سنة والبسمة مرسومة على وجهك والفرحة منقوشة على رسمك وحبة الخير منثورة على أرضك.

كل سنة يا مصر وطبعك هادى وعبيرك نادى وكروانك شادى والشجر بيميل بنسيم الليل على ضفاف النيل فى أجمل صورة للوادى يا عزى وعز ولادى،

كل سنة واللون الأخضر ثيابك فى أحلى كسوة، واللون الأحمر نقدم أرواحنا فداكى للشهادة فى أحلى نشوة، واللون الأبيض طيبة قلبك ومن غيرك الدنيا ولا تسوى،

كل سنة يا بلدى وإحنا من غير جاحد أو حاقد أو ناقم لخيرك ناكر ولولادك قاتل متآمر عميل جبان،

كل سنة وإحنا من غير إرهاب أو خراب أو دمار ولا اعتصام ووقف حال

كل سنة وإحنا فى استقرار من غير جبهات أو ائتلافات أو حركات أو معتصمين ومعتصمات ولا ناشطين أو ناشطات

كل سنة وإحنا كده مصريين بالفطرة والوطنية فينا غريزة وأنت دايما فى قلوبنا عزيزة .

كل سنة وإحنا فى أمان من غير شاطر أو خيبان ولا حتى متغطى ولا عريان، كل سنة وإحنا مش بتوع منظمات ولا حقوق إنسان

كل سنة يا بلدى وإحنا من غير كفاية أو التغيير ولا اتباع شهر إبريل،

كل سنة وإحنا مش حازمون لكن مصممون نكمل طريقنا وناويين نتمم خطتنا ونوصل لبر الأمان،

كل سنة وإحنا مسلمين للمولى متقين نصوم ونصلى لرب العالمين ومعانا فى الوطن أقباط شركاء متعاونين


كل سنة وأنت طيبة يا مصر.






http://www.youm7.com/story/2014/12/1...870#.VJTIvsAys