خير .... اللهم اجعله خير

[بورسعيدى]

السلام عليكم ورحمة الله وبركاته
شفت منام خير اللهم اجعله خير
لوحد فيكم بيعرف يفسر
يا ريت مايطنشنيش
شفت ايه اللهم اجعله خير
انى عايشه فى مصر بس كانت غير مصر اللى احنا نعرفها
شفت الشوارع نظيفه وجميله وفيها ايه مش هتصدقو شفت فيها عواميد النور مولعه بالنهار مش بالليل
وكمان شفت ان كل السلع متوفره والاسعار اسكتو عارفين مالها؟ بقالها سنين مازاديتش وان الجنيه ربنا يحميه بقى جنيه تشتري بيه حاجات كتير وتاخد باقى كمان
والمرور مش هحكى لكم عليه منظم ومافيش زحمه والناس بتحترم قواعده وبتحترم غيرها من غير مايكون فيه ضابط شرطه ولا حتى عسكرى
وبمناسبه الزحمه شفت كمان انه مابقاش فيه طوابير على اى شئ بيقى كل شئ متوفر وتمام وايه كمان صناعه محليه ودا لاننا عملنا مصانع كتير و شغلنا شباب كتير ومابقاش فيه بطاله وتصدقو ؟كل دول اشتغلو بذمه واصبح معدل الانتاج ومستواه يضاهى الصناعات التانيه فما بقناش محتاجين الاستيراد لا وبنصدر كمان وماحدش بيرجع لنا البضاعه لانها غير متطابقه
لا والاكتر من كده ان المرتبات بقت مرتبات محترمه بتكفى وبتزيد وسددنا بيها ديون مصر
تفتكروا الحلم دا ايه
حد يفسر معايا

بس والله بلاش حد يقولى اتغطى كويس وانت نايم