الاعتماد

[حسين دوكي]

سلام عليكم

بداية انا مواطن سعودي ولكن ادرس في مصر و حصلت علي الثانوية من مصر و قد جاء التنسيق لي بهندسة عين شمس فكان لي بعض الاستفسارات :

1- هل هندسة عين شمس معترف بها دوليا ام اذا عدت للسعودية شهادتي ليس لها قيمة؟

2- اريد ان اعرف اكثر عن قسم هندسة مدني و ما الفرق بينه و بين هندسة معماري؟

3- اود شرح لنظام الساعات المعتمدة بالجامعة وهل الوافدين لهم مصاريف خاصة ام ماذا؟

[Asa7be Wawa]

أولا برحب بيك فى عين شمس و مدنى بالذات ان شاء الله

حوار الجوده اه الكليه اخدت الجوة السنة اللى فاتت ايه الجوده دي من الاخر حاجة ملهاش اى لازمة مجرد تجديدات فى المبانى و قاعات التدريس و الهرى ده اما بقى انت معترف بيك دوليا فأحب أقولك بالنسبة للسعودية و الدول العربية طبعا معترف بيك اصلا المصريين ساهموا بشكل كبير فى تحضر و بناء الدول دي ما علينا يعنى ام فى اوروبا و امركيا انت شهادتك متسواش بصله لأنى سألت فى الموضوع ده كتير انت ممكن تكمل ماسترز بره على اللى انت درستة فى عين شمس و بس شكرا على كده حتبقي مهندس كفاءة اما حكاية يعترفوا بيك على طول دي حاجة مقدرش أضمنهالك

الفرق بين مدنى و عمارة بقي
عمارة هو اللى بيشتغل الاول هو اللى بcreate شكل و ابعاد المبنى من شبابيك و مكان و فتحات و وجهات بحيث انه يتناسب مع موقع المبنى نفسه او الغرض منه مثال بسيط لو عندك قريه سياحيه لسه مبينش حاجة فيه فأول حاجة انت عايزها ان جميع شقق و شاليهات القريه تطل على البحر لأن الناس مش هتاخد شاليهات مش عالبحر و انت كده حتخسر هنا بقا بيجي دور المهندس المعمارة او التخطيطي انه يخلى مثلا شكل الشاليهات كلها على شكل منحنى او نص دايرة على البحر و بتدرج فى طول الشاليه من الارض و هكذا بقى هو اللى بيخللق الشكل من الاساس بس ميقدرش بقى يطلع العمارة او الشاليهات هو بيرسمهم و بس و دي مش حاجة سهلة يعنى لأنك تخلق الحاجة من الصفر دي محتاجة مبدع من الاساس

مين بقى اللى بيطلع العمارة و الشاليهات دي هنا بقي بيجي دور المهندس المدنى بياخد لوح و تصميمات المعمارى و يبدأ يدخل بقا جوه الحيطة و الاسقف و الكمرات و يبدأ بقى يقول هنحط كام سيخ حديد هنا ... ارتفاع الكمره دي هيبقي كام و السقف ده يتصمم ازاى و هكذا و الماتريال اللى هيتستخدمها فى التنفيذ و يبدأ يحط الاساسات بتاعت المبنى و عوامل الامان بناء على طبيعة الارض و لو كان مبنى مرتفع و ادوارة كتير يبقي يدخل عوامل الهواء و الزلازل و غيره و غيره بدون الدخول فى تفاصيل كتيره بالتغير فى تخانة بقي و اشكال الحديد و طريقة تصنيع الخرسانة و حاجات تانية كتير بتخدم اقتصاديات البناء و التوفير
فى حاجات تانيه المهندس المدنى بيعملها زى اعمال الطرق من انفاق و كبارى و المطارات و السدود و اعمال الرى بقى بما اننا دولة يقال انها زراعيه يعنى بالاضافة الى البنيه التحتيه فالمهندس المدنى مسئول عن الاعمال الصحية و كمان مسئولين عن محطات تنقيه المياه و أيضا الاعمال المساحية

من الاخر المعمارى بيرسم و يبدع و يخلق الشكل و المدنى اللى بيبنى و يبدع و يوفر كلنا بنكمل بعض


اما اخر سؤال بقى عن نظام الساعات المعتمده مش عايز أحبطك بس فعلا الكلية تعبانة جدا فيه يعنى كل صحابنا اللى فى كريديت أقل مننا كما فى العلم لأنهم بياخدوا مواد انسانيات بجانب المواد العلميه و بالتالى بيأثر على المواد العلمية بالاضافة ان معظم اللى حواليك بيبقي فيه منهم نسبة كبيرة عندها لا مبالاة بالمذاكرة و العلم و تحس انهم بينجحوا بفلوسهم بس طبعا فيها ميزات كتير زى ان العدد أقل بكتييير من الmainstream و انك لو لقدر الله شلت السنة مش حتضيع سنه زياده من عمرك بس هتنزل summer بالمواد اللى انت شايلها و تكمل عادى و دي ميزه احنا مفتقدينها فى الmainstream .. بالاضافة ان فى كريديت عندك 60% أعمال سنه حضور و غياب و شيتات و كويزات و 40 % فاينل بس ! يعنى مش بيبقي فى load على امتحان اخر السنة أنك لازم تنجح و تجيب درجة عاليه فيه زى الmainstream اللى تقريبا 90 % الload على امتحان العملى و الشفوى و اخر السنة مصاريفها كانت ب22 ألف السنه اللى فاتت معرفش الوافدين ايه نظامهم تعالى أسئل فى شئون الطلبة بتاعة كريديت لو انت مهتم بكريديت اوى يعنى

حاجة أخيرة بقي فكك بقي من اللى بيقولك ان عين شمس أصعب كليه و ان اعدادى هندسة دول أسهل سنتين فى تجارة و المعتقل و كلام كتير اوى اوى اوى محبط بدرجة فقيعة فى الكلية عندنا ... الكليه صعبه همم اه المنهاج كبيره اه من اصعب كليات هندسة فى مصر اه بردو ( طب فين يا عم منتا جيت كحلتها عميتها ) بص يا سيدى انت فى اعدادى عندك ستاف عالى اوى اوى من الدكاترة حيوصلك المعلومة و حيشرحلك بس انت خليك مهتم و ذاكر و احضر محاضراتك و سكاشنك و بلااااااااااااااش تقارن بينك و بين اى حد صحابك فى المطرية او القاهرة (مع احترامى ليهم) لانك حتاخد اد اللى بياخدهه مرتين تلاتة و على اصعب كمان ففكك من جو المقارنة و الخوف اللى غير مبرر ده تانى حاجة لو عايز تقارن مستواك فعلا قارن مع الدحيحة اللى معاك فى الدفعة عسى ان تكون واحد منهم ان شاء الله و خليك متفتح و حاول تبدأ من اول السنة تشوف المراجع فى كل ماده اسئل الدكاترة و المعيدين خليك واسع الافق و لحاااح على المعلومة لأنك كبرت خلاص مش زى ثانوية عامة مفيش حد حيبجبلك المعلومة لغاية عندك لازم انت تكون اللى بتسعى ليها طول الوقت

و اوعى اوعى تسمع كلام محبط ارجوك متقعش فى نفس غلطتي


و الف مبروك على دخولك كليتنا العظيمة حبها حتحبك أكرها حتغدر بيك جامد

[حسين دوكي]

ياااااه يا عم افدتني والله كتير جدا يجزاك الله خير

هو سؤال أصلا بالنسبة للقاهرة او أي جامعة في مصر حكومي لو طلعت أمريكا بيها مش برضو هبلها و اشرب ميتها ؟

خليتني احب مدني اكتر هههه اصلي من زمان بعشق البنا و المسلح و الخرسانة و كان حلمي زمان اطلع واحد يقدر يبني مدينة او عماير ...الخ

المذاكرة باذن الله خير انا كده كده أصلا بعيدا عن الثانوية اتعلمت حاجات كتير وخدت كورسات و فهمت فعلا لو عايز تتعلم حاجة اجري وراها لحد ما تجيبها

يعني من الاخر بلاش كريديت مش هيفيد كتير لاني عايز علم مش هاممني راحة و بتاع انا مش داخل اتفسح ههههه

انا شفت كريديت قاهرة قعدوا يحمضنوا كده علي و في الاخر سالتهم الشهادة بتفرق في حاجة قالوا لي لا بس هتكون بتتعلم بالانجليزي و اريح هههههه

كده كده مش هقارن نفسي بحد لاني عارف في عين شمس زاي ما الي اتخرجوا منها قالولي انت هتدرس بجد و ضعف زمايلك في الجامعات التانية بس لو فهمت الي بتدرسه هتطلع مهندس بجد

عندي سؤال هو في عين شمس اعدادي بيكون بالانجليزي ولا زاي قاهرة بالعربي؟

و علي فكرة ما دام اقدر اكمل ماستر و دكتوراه علي شهادة عين شمس بتاعت الباشلر في أي حته في العالم خلاص ده المهم لاني ناوي اكملهم في السعودية أصلا باذن الله فده الي يهمني مش اروح أقول عايز اعمل ماستر في بريطانيا مثلا يقولولي انت مش معاك شهادة أصلا ههههههه

[Asa7be Wawa]

بالنسبة للماسترز عادى بشهادة عين شميس ممكن تعمل ماسترز فى اقوى جامعات فى اوروبا انما انك تشتغل هنااك بشهادتك دى حاجة صعبة جدا

تانى حاجة الدراسة بالانجلش ما عدا الميكانيكا و الرياضة ايه السبب بقا الله اعلم الباقي بقا كله انجلش مش زى القاهرة

[حسين دوكي]

اها تمام ده اهم حاجة اقدر اكمل دراسات عليا بالشهادة

اها فهمتك تمام كده

مشكور جدا و يجزاك الله خير افدتني جدا