حملة العشرين الف تظلم بخصوص الغاء الضم

[عبدالخالق عبدالحميد]

بالنسبة للمثبتين حديثا عايزكم ما توقفوش موقف سلبي ولو مرة في حياتكم وطالبوا بحقكم ده حرام والله اللي بيحصل فيكم ده
ده رزقكم ورزق عيالكم مستنيين ايه وباكيين علي ايه مبقاش في حاجة يتبكي عليها ده شوية ملاليم اللي فاضلين
انتوا عارفين ان مرتبكم بدون ضم المدة وبدون مكافأة الامتحانات زي ماهو بالتربية والتعليم هيكون كام ؟
هيكون اقل من الف جنيه بعد 11 سنة خبرة يعني مبقاش فيه حاجة يتبكي عليها اصلا
عايزين حملة تظلمات بالفاكسات غير مسبوقة ده احنا اكتر من 20 الف لو كل واحد فينا بعت فاكس واحد هيبقي عدد غير مسبوق من التظلمات
انا امبارح بدأت بنفسي وبعثت بثلاث فاكسات الي مكتب شيخ الازهر ووكيل الازهر ورئيس قطاع المعاهد الازهرية وعايز الكل يبعت عشان يعرفوا ان فيه ناس مقهورة ومظلومة وعايزة حقوقها
وعايز الكل يأخذ كلامي علي محمل الجد وميكسلش عشان ميندمش في يوم ماينفعش فيه الندم
وبعدين انت من حقك تتظلم من القرار في خلال 30 يوم من وصوله لك وحتي لو موصلكش اهو جاي في السكة متخافش بس خاف علي رزقك ورزق عيالك وربنا يرجعلنا حقوقنا بأذن الله .