خليهم يشبعوا بيها!!!!!!!!!

[منى ذكى]

خليهم يشبعوا بيها!!!!!!!!! الجملة دى سمعتها وانا بتكلم مع شاب فى عيلتنا عن السفر كنا بنتكلم هل الشاب اللى بيسافر لو عمل شوية فلوس كويسين هيرضى يرجع؟؟!!!!!!!! لقيته بيقول بكل ثقة لا طبعا انا لو سافرت عمرى ما أفكر اجى غير فى الاجازات غير فى الاجازات هو هنا بقا فيه مستوى حياة يرضى اى شاب علشان يعيش ويتجوز ويكون نفسه؟ وراح قايل عايزامشى من هنا وخليهم يشبعوا بيها
انا صدقت فعلا كلامه لان برضو ابن خالتى مسافر وناوى انه يكون فلوس علشان يجى يعمل مشروع هنا لكن فى اول زيارة قالنا انه مستحيل يرجع لان الحياة بره مصر افضل بكتير وهو مالوش هنا اى مستقبل مع العلم انه مش بيتكلم فى نقطة الفلوس بس هو يقصد النظام والحياة

الجملة دى فضلت افكر فيها اوى وقولت طب ايه النظام يعنى هو كل مصر عايزة تمشى؟ طب مين اللى هيعد هنا الحرامية وتجار المخدرات بس ؟

عموما ماهو اى حد دلوقتى بيخلص تعليمه وهوب يسافر على طول وخلاص بقا البيت الترابط اللى فيه بيروح والوداع بيكتر ومعتش حاجة ليها طعم .
كلامى ده مش معناه خالص انى بعتب على اى شاب يسافر انا اخويا برضو سافر لكن متأكدة ان مفيش حل غير كدا علشان يقدر يتجوز اللى اختارها ويعيش سعيد معاها انا بس بسأل هو ايه نهاية الحوار ده ؟ البلد هتفضى يعنى ولا ايه؟ لحد امتى هنفضل مذلولين بره؟ لحد امتى هنفضل نقضى طفولتنا وحياتنا كلها مع اخواتنا وفى لحظة تلاقى نفسك بتودعه وهو ماشى بشنطة سفره ومش ناوى يرجع غير فى الاجازات؟
بحس فعلا ان الموضوع ده بيقتل الفرحة واللمة والذكريات الحلوة.

علشان كدا عايزة اشوف رايكم كلكم ناوين على ايه ان شاء الله؟ ولو فضلتوا هنا هتقدروا تعيشوا حياة مريحة ؟ وتكونوا اسرة وبيت زى اى شخص عادى؟ مع ان ده المفروض ميكنش حلم ده من حقنا كبشر !!!!!!!
طب لو سافرت وشوفت النظام والنضافة اللى احنا محرومين منها هنا هترضى ترجع تانى؟؟؟ياريت اشوف تفاعلكم معايا واللى عنده اى رأى او سمع اى حكاية عن قرايبه او اصحابه يقول علشان نستفيد.

وشكراااااااااا