جربت تصاحب اختك

[sunsero2000]

السلام عليكم

انا النهارده يا شباب كنت عاوز اتكلم فى موضوع رخم شويه هو مش رخم اوى يعنى بس مهم

معظمنا ليه اخوات بنات فيه اللى اكبر منه واللى اصغر منه واللى قده
بس مين فينا بيتكلم مع اخواته البنات
مين فينا حاسس انه اخواته مش بيدايقو منه
مينه فينا اخته بتحكى معاه عن مشاكلها

مين فينا لو حس انها مدايقه ممكن يشوف ايه اللى مدايقها ويحاول يساعدها زى ما بتعمل مع المزه بتاعتك لو شفتها بس مدايقه شويه صغيوره ممكن تهد الدنيا انما اختك يا عينى ممكن تكون شايفها بتولع وتروح كمان تكمل عليها

ممكن سوال وسط الرغى ده كله
امتى اخر مره قعدت مع اختك واتكلمت معاها وسالتها ايه اخبارها مع زمايلها او فيه مشاكل ولا حاجه خلى باللك انا مش بقولك تحشر نفسك فى خصوصيتها ومع اصحابها بس عاوز اوصلك يعنى كلام زى مابتكلم مع واحد صحبك وامتى اخر مره جبتلها هديه (دى مش لازم بس على الاقل عاملها زى مزتك )

طب بلاش السؤال ده

ياترى لما تكون مخنوق من حاجه ممكن تفضض لاختك ؟
طبعا هتقول لا ازاى اقولها على اسرارى دى ممكن تمسكها عليه ذله وتلوى دراعى اقولك يا حبيبى مات مش هتفضض لوحدك هيه كمان اكيد هتتكلم وهتكون اسراكو مع بعض احسن ما تروح تقول لحد غريب


اخر نقطه بقه

لو جه فيه وعرفت ام اختك على علاقه مع واحد وجيت انت سالتها وضربتها وعملت العمايل
وقالتلك انا على علاقه بالشاب ده لانى مش لاقيه حد اتكلم معاه ولا اقوله على مشاكلى ولما باجى اتكلم معاك بتزعقلى فمش لاقيت الا ده بيسمعنى هيكون شعورك ايه
طب لو قالتك اشمعنى انت بتكلم بنات وتخرج وتعيش حياتك

كده انا خلصت وانا اسف يعنى انى طولت عليكم واسف كمان على اسلوبى فى الكتابه انا عارف انه وحش بس الموضوع ده حبيت اتكلم فيه عشان شوفته ادامى وحبيت انقله ليكم وتقولو رايكو فيه


والشباب اللى يدخل الموضوع بقه مش يزعل منى ولا يقول غاوى
بنات وكده

والى موضوع اخر ان شاء الله