أمّة لم ولن تعرف حرية الآراء

[222ahmed222]

يوم الأحد الماضي كنت متجه نحو الكليه ف الجيزه وانا ف طريقي كنت راكب مواصله المهم واحد كبير راكب جنبي كدا فالناس بيتكلموا عن الاخوان والجمعيه التأسيسيه وتلك المهزله التي حدثت في تشكيل اللجنه التأسيسيه
والرجل اللي جنبي راح اتعصب وقعد يقول "اخوان ايه ماكلنا مسلمين وخلاص مفيش حاجه اسمها اخوان ومش اخوان ولا هم بيضحكوا ع الناس بالدقون؟ " فحصل نقاش كبير حول الموضوع دا ف العربيه وانا كنت اربأ عن اني اتدخل في النقاش دا لحد ما واحد قال انا هرشح حازم صلاح ابو اسماعيل فالرجل اللي جنبي قعد يشتم ف الشيخ حازم قولتله حضرتك ممكن تعترض معاه بس من غير اهانه والعربيه فيها بنات لأنّه كان بيشتم بطريقه سيئه جدا
المهم فانا قولتله انا بردو مش هرشح حازم صلاح بس بحترمه راح قالي طب هترشح مين قولتله هرشح الدكتور عبد المنعم ابو الفتوح
راح اتعصب تاني وقالي ماهم كلهم اوحش من بعض قولتله دي حريه حضرتك ايه اللي زعلك قالي لا دي مصلحة البلد
وراح قالي مفيش غير شخص واحد ينفع يكون رئيس قولتله مين راح قالي " مين اللي كان نائب مبارك؟ عمر سليمان وهو كمان كان رئيس المخابرات فهو الوحيد فيهم اللي يفهم ف السياسه وينفع يبقى رئيس" انا روحت اتخنقت وقولتله حضرتك يعني احن عملنا ثوره عشان نحوشه هو ومبارك ايه اللي نبقى عملناه بقى لما يرجع هو رئيس تاني؟
راح قاللي ايوه ماهو الوحيد المحنك سياسياً انما دول كلهم .....
فقولتله طب خلاص حصل خير عشان انا مش عاوز اتنرفذ
وفعلاً سكتنا خالص لحد ما واحد ورا راح سأل واحد تاني بيقوله انت ايه رأيك ف جمال عبد الناصر؟ روحت قولتله انا كلمه واحده " كان ديكتاتور" راح الرجل اللي جنبي بقى اتعصب بشكل مش عادي بيقول ديكتاتور ايه دانا امبارح واحد قال قدامي الكلمه دي كنت عايز اشق بطنه بسكينه !!!!!!!!
وقعد بقى متعصب خالص وبيتكلم بصوت عالي جدا وانا بفقد سيطرتي ع اعصابي لما حد يعلي صوته عليا فقولتله يا حج هدي نفسك مش مستاهل الموضوع دا كله راح قاللي ازاي بقى تقول على الريس جمال دكتاتور وعايزني اسكت؟؟؟؟؟؟ دانا والله كان نفسي امبارح اقتل واحد عشان قال كدا
.............
وللموضوع بقيه بس مش هعرف اشرحها
كل اللي عاوز اقوله اننا مبقيناش نتقبل الرأي الآخر وبلدنا مش هتنهض لو فيها رأي واحد فقط لأن الاختلاف هو اللي بيجيب الافضل بس الاختلاف دون منازعات
لكِ الله يا مصر