هما احسن مني؟؟

[Free Canary]

السلام عليكم و رحمة الله و بركاته

اولا انا بحييك على طرح الموضوع المميز ده

بصراحة انا مقراتش ردود الاعضاء قبلي و معرفش رايهم ايه من جهة الموضوع ده...بس انا متوقعة ان المعظم هيجيب العيب على المجتمع او على الغير
من وجهة نظري اي شخص بيصنع نفسه بنفسه ...صحيح الناس بتتاثر ببعضها و اي يحد ممكن يتاثر باللي حوليه و اكيد بيتاثر بالمجتمع و ده الطبيعي بس الطموح و العزيمة بتولد المواهب و الاختراعات....
مثلا انت طالب اكيد مش محتاج حد يقوللك ذاكر عشان تذاكر.......طموحك و هدفك هو اللي هيخليك تذاكر(و ربنا يوفقك في تحقيق اهدافك)
بالنسبة للاوليمبيات اللي بتتكلم عنها .اعذرني مقدرش اتكلم عن البرمجة و السوفت وير (مليش فيهم) بس ممكن اكلمك عن اوليمبيات الكيمياء و الرياضة و الفيزياء انت بتسال احنا فين من دول....الصراحة احنا عندنا في مصر طلبة اذكياء و عباقرة جدا و مؤهلين كمان انهم يشاركوا في المسابقات دي بس يمكن مشكلة الوقت دي بتعمل ازمة.لان معظم او بمعنى اصح كل الطلبة الاذكياء و العباقرة الوقت عندهم مهم جدا (و ميحبوش ابدا وقتهم يضيع هدر......طب انت بتتكلم في اولومبيات ..ده احنا يوم ما كانوا بيتكلموا عندنا في الفيوم عن مسابقة اوائل الطلبة للثانوية العامة كانت مشكلة كبيرة.طيب هنذاكر ازاي,اكيد الوقت هيضيع مننا,لا لا لا احنا هننسحب من المسابقة دي..و في النهاية المسابقة اتلغت)

بصراحة انا مش عارفة ايه السبب اللي جعل الوقت مشكلة اوي كدة و فعلا معرفش ليه الوقت مشكلة كبيرة بالنسبة لاغلب الطلبة بس انا فعلا الوقت بالنسبالي مهم جدا(و قليل جدا ) يمكن عشان المناهج بتاعتنا صعبة و كتيرة فتقريبا بتسيطر على وقتنا كله

(معلش انا برغي كتير اوي)

خلاصة كلامي احنا في مصر عندنا مواهب كتير جدا و عباقرة اكتربس الوقت مشكلة
بس تعرف..........في الاجازات فعلا الحاجات دي هتبقى مفيدة جدا بس في الدراسة فالوقت ازمة و على فكرة لو الوزارة عدلت في المنهج و بسطته بردو هيفضل الوقت ازمة كبيرة لان ده مجرد احساس عند الطلبة كلهم(احساس بالخوف من الوقت )مش كل الطلبة طبعا اقصد كل الطلبة اللي يصلحوا فعلا انهم يتاهلوا للاوليمبيات دي
و هي دي اجابتي على سؤالك بتاع احنا فين من دول....احنا موجودين بس منقدرش نبقى من دول عشان معندناش الجراة اللي تخلينا نغامر بوقتنا و لا انت عندك راي تاني؟؟؟؟؟؟؟
اما بلنسبة فان السبب في المجتمع و لا فينا فهو فينا احنا لان اي حد مؤهل فعلا للمشاركة يقدر يشارك لكن زي ما قولت .الجراة مش موجودة عند الكل...او تعرف يمكن يكون السبب ان احنا بنحس اننا مش مؤهلين لتمثيل بلدنا في الوليمبيات دي اقصد يعني معندناش الكفاءة او القدرة اللي تخلينا نشارك فيها بس ده بيبقى مجرد احساس بس يعني فعلا في طلبة كتير مؤهلين للاشتراك فيها .....ايا كان السبب فهو فينا احنا مش في المجتمع
اضافة اخيرة :انا قولت قبل كدة ان عندنا في مصر فعلا عباقرة كتير و اذكياء و مؤهلين فعلا انهم يشتركوا في الاولمبيات دي بس اغلبية الطلبة دول او كلهم يدوب بيبقوا عايزين يحققوا احلامهم و السلام ....... يعني بالنسبالهم التعليم مرحلة و تعدي او سكة هنوصل بيها للكلية اللي عايزينها و خلاص,مبيهتموش بقى بالمسابقات و الكلام ده..او بمعنى اصح مفيش روح المنافسة اللي تخليهم يمثلوا بلدهم ضد بلاد تانية يعني بيكتفوا بالمنافسة اللي في الفصل او المدرسة او الجمهورية بالنسبة لاوائل الجمهورية(ان كان فعلا في منافسة بين اوائل الجمهورية)

(عندي كلام كتير لو قعدت اقوله من هنا للصبح مش هيخلصمش عارفة ليه حاسة ان انا بلف في متاهات و ان انتو مش فاهمين حاجة من كلامي.........خلاص هامشي بقى و امري لله بس اتمنى يكون رايي وصلك.او بمعنى اصح اتمنى تكون فهمت حاجة من كلامي )

ارجو ان تتقبل مروري