"ملتقى طلاب 3 ثانوي"

[سري جداا]

السلام عليكم
انا مش عارفه فى مشاكل لسه مستنيه تتحل ولا لا
بس انا عموما هتكلم لان الكلام فى حد ذاته بيريحنى ولو حد حابب يعرض مشكلته برضه فى نفس الوقت يتفضل برضه
هو انا مش عارفه ابدأ منين يعنى حاسه ان عليا تراكمات كتير اوى
مع ان محدش اما بيشوفنى بيفكر انى عندى مشاكل ومضايقه او اى حاجه من دى
انا على طول بهزر وبدخل اى لمه مع اصحابى اقلبها ضحك وهزار
انا حتى مش عارفه احدد مشكلتى ايه بالظبط عشان احلها
من الاخر انا حاسه انى تايهه جداا وقراراتى كلها مضطربه كده وثقتى فى نفسى مش كبيره
الناس كلها فاكرانى ملاك ومثال للبنت الملتزمه اللى بتعمل كل حاجه صح
انا يمكن كده فعلا بس انا حاسه او هو فعلا ظاهريا بس
او مش فى كله
يعنى انا مثلا لبسى واسع وطرحتى كبيره ومش بكلم ولاد خالص فى الكليه الا فى اضيق الحدود ده حتى هما اللى بيبقوا بيسألوا على حاجه مثلا فبتالى برد
لكن انا اهو بقالى سنه فى الكليه مش فاكره ولا مره انى بادرت ان انا اللى اكلمهم او اقف معاهم زى معظم البنات والكلام ده بيبقى انا وصحبات يعنى مش ببقى لوحدى يعنى
وده اللى انا فعلا مقتنعه انه غلط لكذا سبب يعنى يعنى مش بعمل كده تمثيل او عشان اظهر ملتزمه ادام الناس
بس عالقيض مثلا كنت لحد فتره قريبه بكلم شباب عالنت
مع انى كنت بطلت من فتره كبيره
بس للاسف رجعت تانى اكلم
بس هما مش شباب بقى كتير وهيصه كده لا هما تقريبا اتنين ومش بتكلم معاهم عشان انا عايزه اكلمهم او اسمع منهم كلام او كده
لا انا بكلمهم عشان فعلا كنت برتاح جدا انى احكيلهم مشاكلى يعنى كنت بحكيلهم زى ما بحكيلكوا كده تمام وهما كان كانوا بيحكيولى مشاكلهم يعنى تقدروا تقولوا كلام اخوات مع بعضهم ولو ان كلمه اخوات دى بحس انها بنذوق بيها الطريقه اللى بنكلم بيها يعنى لان اننا فعلا مش اخوات ولان اى حاجه بتحصل فى الضلمه تبقى غلط ولانى واثقه انى مقدرش اقول لاهلى فى البيت انى بكلمهم فبتالى تبقى دى حاجه غلط
وانا فعلا كذا مره قلتلهم هما الاتنين على وجهه نظرى دى وهما اقتنعوا بيها وكنا بنبطل كلام فتره وغيرت الميل كذا مره عشان حتى ما لقيش حد فيهم ويسلم عليا مثلا والسلام يجيب كلام وكده
بس برضه احيانا من وقت للتانى بلاقى حد فاتتح وبيقى فيه كلام
المشكه انى حاسه انى منافقه مع اصحابى
يعنى اما بعرف ان واحده من صاحباتى بتكلم ولاد عالنت وكده بفضل اكلمها واقولها تبطل وهى طبعا مش متخيله ولا يجى فى بالها اصلا انى بكلم بس ده للاسف اللى بيحصل ولو انى عارفه الفرق بين كلامها وكلامى بس برضه فى النهايه بنتساوى اننا بنتكلم !!
المشكله التانيه بقى او قولوا المصيبه انى للاسف بقيت بقطع فى الصلاه او مش بقيت بصراحه انا من زمان وانا بقطع فى الصلاه
يعنى بلتزم فتره وكده وبواظب وبعد كده اقطع تانى وافضل كتيييييير لحد ما ارجع اصلى تانى ودى بجد حاجه مسببالى رعب جدا
خايفه اموت وانا مش بصلى
حاسه ان الموت قريب اوى اصلا
فى اقل من شهر مات تقريبا 5 اشخاص اعرفهم وسنهم مش كبير
منهم اتنين عندهم 17 سنه يعنى من سنى يعنى كان ممكن جدا اكون مكانهم
مش عارفه هقابل ربنا اقوله ايه
انا حتى اما بصلى مش بحس بالصلاه
حتى لو اتحفزت شويه كده وصليت فتره برجه اقطع تانى
المشكله ان عالرغم من ان اهلى معروفين بالتدين وكده الا انهم مهتموش يعلمونى اواظب عالصلاه زى ما اهتموا يعلموا اخويا اللى اكبر منى بسنتين
فللاسف دى اثر عليا كتير
مهم لو كانوا عودونى كنت زمانى بصلى على طول
بس برضه دلوقتى الغلط مش عليهم الغلط عليا انا
انا مش عارفه بجد اصلح من نفسى ازاى
نفسى مبقاش حاجه من برا وحاجه تانيه من جوا
انا خايفه جدا من فكره ان الموت قريب منى انا حتى بفكر انى ممكن اموت بعد ما اكتب الرد ده على طول وانا لسه مصليتش العصر
انا عموما هقوم اصلى العصر وكل اللى طالباه من منم اكتر حتى من الرد عليا انكوا تدعول بظهر الغيب ان ربنا يهدينى
واسفه انى طولت بس انا حبيت اوصلكم صوره كامله وحاسه انى ناسيه حاجات برضه
وشكرا عالفرصه دى بجد جزاكم الله خيرا
والسلام عليكم ورحمه الله وبركاته