يوميات المواطن حنفى ؟؟؟

[هيدى عمر]

الحلقة الخامسة : فى الشغل

(طبعا زى مانتو مش عارفين , حنفى شغال مدرس فى مدرسة اعدادية , وبما إن اليومين دول فى امتحانات فحنفى كان عنده مراقبة على لجنة . حنفى دخل اللجنة وبدأ يعمل شوية حركات من بتوعه)

حنفى : اسمع يافاشل انت وهو , حسك عينك أى واحد فيكم يفكر , مجرد انه يفكر بس فى إنه يغش حرف من اللى جنبه , والحمام ممنوع , لو العملية قفلت معاك أوى , اعملها على نفسك واحنا هنبقى نتصرفلك فى هدوم , وممنوع حد ياخد أدوات من غيره , انتو جايين امتحان مش محل بلاى ستيشن , سامع يافاشل منك له .
(العيال قعدت تبص لحنفى وهو بيكلم , وكأنها بتبص لمخلوق فضائى جاى من المريخ , ومستغربين انه داخل عليهم سخن أوى , المهم ورق الاجابة جه , وحنفى بدأ يوزع الورق )
حنفى : كل جحش فيكم يكتب اسمه ورقم جلوسه على الورقة من برة ويحط أى حاجة تحت الورقة عشان الكلام مايطبعش وتكتب اسم المادة فى الخانة اللى فوق دى .
أحد التلاميذ : أستاذ , أستاذ
حنفى : هو احنا هنبتدى أسئلة من دلوقتى , عايز ايه يا منيل
التلميذ : هو احنا هنمتحن مادة ايه النهاردة؟
حنفى : نعم ياخويا, هتمتحن مادة ايه النهاردة , ده انت هتتعلق حالا
التلميذ : لا والنبى ياأستاذ , كله الا التعليق ده أنا كنت بهزر معاك والله
حنفى : بتهزر , طيب ,, أنا هاعرفك ازاى تهزر تانى معايا
أحد التلاميذ : أستاذ , أستاذ
حنفى : اللهم طولك ياروح , فيه ايه يابنى ,عايز تهزر انت كمان ولا حاجة؟
التلميذ : لا ياأستاذ , أصل أنا كنت بكتب وأنا سرحان فكتبت اسم اللى جنبى فى ورقتى بدل مااكتب اسمى
حنفى : الله يخربيتك , هو انت هتبدأ الغش من دلوقتى , يعنى أعملك محضر غش دلوقتى
التلميذ : محضر غش ازاى ياأستاذ , هو ورق الاسئلة اتوزع لسة ؟؟
حنفى: ده انت بتتلامض كمان , ده انا هبهدلكم النهاردة , اعمل خط صغير على الاسم اللى انت كتبته واكتب اسمك فوقيه
التلميذ : بس فى حاجة تانية ياأستاذ
حنفى : قول ياخويا , ماهو أصلا اليوم باين من أول ماشوفت مراتى الصبح
التلميذ : الواد اللى جنبى برضه كان سرحان وهو بيكتب اسمه ,فكتب اسمى فى ورقته بدل مايكتب اسمه.
حنفى : الله يخربيتكم انتو الاتنين , خلاص يا ساقط انت وهو بدلو ورقكم مع بعض
التلميذ : نبدل الورق ؟! بس ده كده يبقى غش ياأستاذ
حنفى : ده انت يومك مش هيعدى النهاردة . غش ايه يا أبو جهل ,هوانتو خدتوا ورقة الاسئلة لسة
التلميذ : هو مش انت كنت عايز تعملى محضر غش من شوية ؟؟
حنفى: مستعجل أوى على المحضر , ماتقلقش نفسك , المحضر هيتعملك النهاردة لو فضلت تتلامض كتير كده
التلميذ : لا خلاص , انا اسف ياأستاذ

( ورق الاسئلة جه , وحنفى وزع الورق على التلاميذ)