طب اسنان ..صيدلة..علاج طبيعى..؟؟؟

[DR.Neuro]

بصى حضرتك
دة كلام طبيبة اسنان

الكلية برده ليها مميزاتها وعيوبها...واول حاجة فيها انها محتاجة قوة بدنية فعلا...بس ايام الدراسة بس....عشان تلاحقى على المذاكرة والعيادات وكده...بس ده بيكون فى سنة تالتة ورابعة بس
لكن الشغل الحقيقى بره طبعا بيكون بمواعيد مش طحن كده زى الكلية...فزيها زى اى شغل محتاج مجهود...مش سوبر اوى يعنى
وبالعكس كمان....انا شايفة انها ممتعة جدا....يعنى محتاجة فنان او حد رايق بيحب يفن ويطلع شغل حلو...ومن اهم الحاجات اللى كنا فاهمينها غلط وفهمناها صح لما دخلنا الكلية واشتغلنا عملى....ان القوة البدنية مش اهم حاجة بقدر الفهم وطريقة استخدام القوة....يعنى مش لازم يكون عندى عضلات عشان اعرف اخلع...بس لازم اعرف ازاى اتحكم فى ايدى وبقوة بسيطة جدا اقدر اخرج السنة....

واهم ميزة طبعا انها بتجيب فلوس جامد بس برده بتصرفى فلوس كتير اثناء الدراسة..كتير كتير يعنى

وبجد الكلية دى كنت زعلانة جدا انى دخلتها عشان المجموع...لكن بعد كده لقيتها احسن من غيرها كتيير

العيوب بقى....مع انى متضايقة منها دلوقتى بس مش عارفة بجد اطلع عيب مناسب....العيوب اللى فيها موجودة فى كل كلية وكل مكان...وهى الكوسة "معلش اصل النتيجة لسة طالعة ومفقوعة منها جامد"...وفكرة ان اول سنة فى علوم ومعاملة الدكاترة ساعات بتبقى مش هى وده لحقد دفين جواهم بيقولوا اننا مش دكاترة وكده...حتى ساعات بتوع بشرى بيقولوا كده علشان مش بندرس مواد بشرى بالتفصيل زيهم
بس فى ميزة برده فى ده...ان طب اسنان ده يعتبر تخصص لوحده...وبندرس بس الحاجت اللى ليها علاقة بينا من مواد بشرى مش كل الدش اللى مش هيهمنا فى حاجة

بالنسبة للمذاكرة شايفاها معتدلة جدا....يعنى محتاجة حد يفهم ويتابع...مش زى مذاكرة ثانوية عامة ولا طب بشرى خالص

حاجة اخيرة...اهم حاجة فى الكلية دى بجد عشان الشغل بعد كده ان ايدك تكون كويسة وحابة المجال وحابة تفهميه...مش مهم تقديرات وناس صميمة وكده....لان مجال الشغل محتاج الفهم ده وحب المجال خاصة ان الاسنان اى غلطة فيها ممكن تؤدى لمشاكل جامدة فعلا