السلام عليكم و رحمة الله
وعليكم السلام ورحمة الله وبركاته
أول نقطة تفتيش
طبعا مصر او اى دولة تانية او اى حاجة عامة فيها الحلو و فيها الوحش
ليه بقى لما نيجى نتكلم عن الوحش بتاعها الكل يقول
ايه يا جماعة
ليه شايفين نص الكوباية الفاضى بس ؟
لازم تشوفو نص الكوباية المليان
بصى يا ملاك والله انا على طول بقول كده بس انا نفسى مابقتش شايفه الكبايه اصلا ولو اتشافت بتبقى فاضيه
اوك
نيجى بقى نشوف نص الكوباية المليان
و نقول مصر فيها حلو كذا و كذا و كذا
نلاقيهم بيقولولنا
انتو كده
سلبيين
عاملين زى النعام بيدفن راسه فى الرمل
لازم تتعلمو تعترفو بمساؤئكم عشان تتصلح و عشان ...و عشان.......الخ
السؤال بقى
ايه المطلوب بالضبط مننا؟
ف موضوع زى ده لو عايزين نمسك العصايه من النص يبقى هنمشى مع الموجه يفرحوا نفرح يزعلوا نزعل
بس لو عايزين نعمل حاجه بجد هنبص على الكوبايه من فوق نشوف الفاضى والمليان ونحاول نصلح والاهم اننا نبدأ بنفسنا
***************
تانى نقطة تفتيش
لو انت مثلا جيت تتكلم فى السياسة او فى اى حاجة عامة من اللى ممنوع الكلام فيها
طبعا الكل هيقولك
ياابنى امشى جنب الحيط
لا لا
ده دلوقتى امشى جوا الحيط
السؤال بقى
ياترى لو مشيت جوا الحيط هتبقى جبان؟
طيب لو مش سمعت كلامهم
و عملت اللى انت شايفه صح
و انت بتقول رايك
و اتكلمت برده فى المواضيع اللى بتزعل دى
هل هتبقى طايش و مش بتعرف تحكم ع الامور كويس؟
بداية احنا متفقين على ان اللى بيقولولنا نمشى جمب الحيط بيبقى خوف علينا مش يعنى مجرد فرض سيطره
وكمان هما اتعودوا على كده بيمشوا تبع الموجه مش بيحاولوا يغيروا
ولو فكرنا ف الموضوع ده بواقعيه شويه هتلاقى فعلا لو حاولتى تعملى حاجه انتى نفسك مش هيبقالك وجود مش حلمك بس
وعشان كده بيعتبروه طيش
***********
تالت نقطة تفتيش
هو احنا عايزين ايه بقى بالسبة للتعليم
يعنى
عايزين نفهم
و لا نحفظ؟
بمعنى تانى
و احنا فى الثانوية
كنا بنقول اصلا ده نظام........و نظام فاشل
و هما اصلا مش عايزين البلد تتقدم
اوك
جينا للكلية
النظام برده الى حد ما مش اوى
المهم
ليه بقى لو جه دكتور مثلا قالنا يا جماعة افهمو المادة -طبعا المادة دى الفيزيا 
-و ده اللى انا عايزه و فعلا الدكتور عايز يطلع جيل فاهم جيل يعمل حاجة
الكل يدعى عليه بجميع الدعوات اللى ممكن تخطر ع بالكم -طبعا دعوات وحشة-
و الله يا جماعة كنت بتكلم انا وواحدة صاحبتى
قالتلى يا ملاك بصى من الاخر كده انا عايزة حاجة احفظها و اصبها فى دماغى و اروح الامتحان اطلعها فى الورقة و خلاص كده
بقولها يابنتى طيب انتى فى الكلية لازم تفهمى كل حاجة
قالتلى و لو فهمت يعنى
هعمل ايه؟
المهم نفس البنت
فى محاضرة الدكتور اللى عايز يفهم -او هو صراحة مش عايز يفهم اوى هو همه الاول انه يطلع جيل مش حافظ جيل ممكن يعمل حاجة-
المهم
قاعدين طبعا
ساعتين فيزيا
دماغنا خلاص هتنفجر
الكل عايز ينام
طبعا الجماعة اللى فى البينجات اللى ورا نايمين
لاقيت البنت دى بقى
بتقول
يارب يارب
يارب المدرج يولع ينا و بيه عشان نخلص من الفيزيا و همها
بس الغريب بقى
ان نفس البنت بتذم فى التعليم و الاسلوب و المناهج
السؤال بقى
احنا عايزين ايه؟
بالنسبه للطلبه فى اللى عايز يفهم وفى اللى عايز يحفظ بس بنت زى اللى بتحكى عليها مش عايزه تفهم حاجه ايه اللى يدخلها كلية علوم من الاساس
بصى الحكايه دى يمكن بيتحكم فيها حاجات تانيه وهى امانى الاهل واكيد البنت دى يا اما ف البيت عايزين كده يا اما داخله الكليه عشان الاسم
بس انا عن نفسى لما بدرس حاجه بحاول استفاد بيها بكل المقاييس واكبر دليل على كده ان المواد اللى بحس انها هتفيدنى بحتفظ بيه
******************************************
اخر حاجة بقى بعيدا عن الموضوع تماماً
و مالهاش اى علاقة بالموضوع
بس حاجة عايزة اقولها للكل
" ياريت يا جماعة نبقى نعذر بعض فى اخطاءنا
و نحط نفسنا مكان غيرنا
و لما نزعل من بعض نواجه بعض مش نبيع اى حد بيحبنا أو بنحبه و خلاص مش فارقة خالص
و بكرر تانى
الصداقة الصداقة الصداقة
حافظو عليها بكل طاقتكم و الله هنندم لو ضاعت مننا بس يمكن الوقت اللى هنندم فيه مش نعرف نعوضها"
تسلمى حبيبتى على النصايح الغاليه
وبجد الموضوع رااااااااااااااائع
كان نفسى اعمل حاجه زى كده بس بمواضيع مختلفه وبصراحه انتى كبرتيها ف دماغى 
14-11-2008, 06:06 PM
العرض المتطور
