نقاااااااااااااااااااااط تفتيش!!!!!!!!!

[طـفـلـة الامـس]

المشاركة الأصلية كتبت بواسطة أرق ملاك

السلام عليكم و رحمة الله

ازيكم يا جماعة ؟اخباركم ايه؟
يارب يكون الجميع بخير

الحمد لله بخير

موضوعى النهاردة مالهوش علاقة ببعض بس حاجات بتدور فى دماغى
فقلت اشوف رايكم ايه؟
اتفضلى

أول نقطة تفتيش

طبعا مصر او اى دولة تانية او اى حاجة عامة فيها الحلو و فيها الوحش
ليه بقى لما نيجى نتكلم عن الوحش بتاعها الكل يقول
ايه يا جماعة
ليه شايفين نص الكوباية الفاضى بس ؟
لازم تشوفو نص الكوباية المليان

اوك
نيجى بقى نشوف نص الكوباية المليان
و نقول مصر فيها حلو كذا و كذا و كذا

نلاقيهم بيقولولنا
انتو كده
سلبيين
عاملين زى النعام بيدفن راسه فى الرمل
لازم تتعلمو تعترفو بمساؤئكم عشان تتصلح و عشان ...و عشان.......الخ

السؤال بقى
ايه المطلوب بالضبط مننا؟
اقولك ايه المطلوب
مش ننسى او نتناسى بمعنى اصح كلا منهما
ده مطلوب وله وقته وده مطلوب برده وله وقته
يعنى مثلا مش لو واحد غريب جه مصر فى زيارة امسكه اقوله دى فيها وفيها واخليه يكره اليوم اللى فكر فيه ييجى
واحنا برده لازم نفتكر الحاجات الكويسة عشان تدينا امل اننا نصلح اللى مش كويس
وان كان اللى مش كويس هو الغالب طبعا
بس هو ده اللى المفروض نعمله عشان نواصل ونقدر نواجه العقبات والمشاكل اللى بتقابلنا

تانى نقطة تفتيش

لو انت مثلا جيت تتكلم فى السياسة او فى اى حاجة عامة من اللى ممنوع الكلام فيها

طبعا الكل هيقولك
ياابنى امشى جنب الحيط
لا لا
ده دلوقتى امشى جوا الحيط

السؤال بقى

ياترى لو مشيت جوا الحيط هتبقى جبان؟
طيب لو مش سمعت كلامهم
و عملت اللى انت شايفه صح
و انت بتقول رايك
و اتكلمت برده فى المواضيع اللى بتزعل دى
هل هتبقى طايش و مش بتعرف تحكم ع الامور كويس؟
اصل اللى بيتكلم فى الحاجات دى مصيره بيبقى معروف
فكل واحد بيحاول يحافظ على نفسه ويسكت احسن ما يجيب لنفسه المشاكل
واغلب الناس بتعمل كده

تالت نقطة تفتيش

هو احنا عايزين ايه بقى بالنسبة للتعليم
يعنى
عايزين نفهم
و لا نحفظ؟

بمعنى تانى

و احنا فى الثانوية
كنا بنقول اصلا ده نظام........و نظام فاشل
و هما اصلا مش عايزين البلد تتقدم
اوك
جينا للكلية
النظام برده الى حد ما مش اوى
المهم
ليه بقى لو جه دكتور مثلا قالنا يا جماعة افهمو المادة -طبعا المادة دى الفيزيا -و ده اللى انا عايزه و فعلا الدكتور عايز يطلع جيل فاهم جيل يعمل حاجة

الكل يدعى عليه بجميع الدعوات اللى ممكن تخطر ع بالكم -طبعا دعوات وحشة-
و الله يا جماعة كنت بتكلم انا وواحدة صاحبتى
قالتلى يا ملاك بصى من الاخر كده انا عايزة حاجة احفظها و اصبها فى دماغى و اروح الامتحان اطلعها فى الورقة و خلاص كده
بقولها يابنتى طيب انتى فى الكلية لازم تفهمى كل حاجة
قالتلى و لو فهمت يعنى
هعمل ايه؟
المهم نفس البنت
فى محاضرة الدكتور اللى عايز يفهم -او هو صراحة مش عايز يفهم اوى هو همه الاول انه يطلع جيل مش حافظ جيل ممكن يعمل حاجة-
المهم
قاعدين طبعا
ساعتين فيزيا
دماغنا خلاص هتنفجر
الكل عايز ينام
طبعا الجماعة اللى فى البينجات اللى ورا نايمين
لاقيت البنت دى بقى
بتقول
يارب يارب
يارب المدرج يولع ينا و بيه عشان نخلص من الفيزيا و همها
بس الغريب بقى
ان نفس البنت بتذم فى التعليم و الاسلوب و المناهج

السؤال بقى
احنا عايزين ايه؟
بجد وانا داخلة الكلية كان نفسى افهم
نفسى اتعمق فى العلم بس اكون فاهمة
وده للاسف مش لاقياه
قليل جدا لما اطلع من محاضرة فاهمة كل حرف فيها
دى حاجة صعبة جدا وقلما تحدث
وبصراحة انا شايفة ان نظام الكلية احسن بكتيير من الثانوية
بس اقبح شىء ان مفيش حد بيفهمك اوى زى الثانوى
ولا حد تساليه وكده
بس اللى عايز كده بيدور ويلاقى
******************************************
اخر حاجة بقى بعيدا عن الموضوع تماماً
و مالهاش اى علاقة بالموضوع
بس حاجة عايزة اقولها للكل

" ياريت يا جماعة نبقى نعذر بعض فى اخطاءنا
و نحط نفسنا مكان غيرنا
و لما نزعل من بعض نواجه بعض مش نبيع اى حد بيحبنا أو بنحبه و خلاص مش فارقة خالص
ماحدش بيحط نفسه مكان حد
كله بيخبط الكلام ويتصرف تصرفات ما يحبش انه يتحط فيها
بس فعلا المفروض اننا نخلى نفسنا الاحسن
لان الدنيا دى مش مستاهلة اى حاجة
وفى اى لحظة ممكن تبعدى عن الشخص ده ولربما كانت اللحظة دى قريبة جدا
و بكرر تانى
الصداقة الصداقة الصداقة
حافظو عليها بكل طاقتكم و الله هنندم لو ضاعت مننا بس يمكن الوقت اللى هنندم فيه مش نعرف نعوضها"
مش يمكن
ده اكيد
معلش بقى
عملتلكم تشتيت جامد المرة دى

اتمنى الاقى حد دماغه مكانها بعد التشتيت ده كله عشان يرد ع الموضوع

موضوع جميل يا ملاك
شكرا جزيلا يا روحى
بتنورى المنتدى لما بتطلى كده علينا