استمر فى الفرنساوى و لا لأ...؟؟؟؟

[yoyeta]

اهلاً يا جماعة ازيكم
انا هحكيلكم حكايتى مع الفرنساوى من اول ما اخده
انا ابتديت فى درس الفرنساوى السنة دى من يوم 17\8 و هقولكم ايه اللى حصل معانا من اول حصة لغاية دلوقتى

اول حصة..:
كنت رايحة اول حصة لسة معرفش اى حد فى الدرس و لا فى الفرنساوى و طبعاً الدرس الواحد لا يقل عن 25 طالب ان مكنش اكثر اصل انا ما عديتش احنا كنا كام واحد فى الدرس
اول حاجة عاملها المسيو قرا التاريخ بالفرنساوى و خلانا نقرا وراه و طبعاً كانت متحيز جدا للدارسين فرنساوى قبل كده و بالنسبة للنطق فهى دى العقدة اللى هو ربهالنا و كل شوية يقولنا انا شكلى كده هتعب مع المحموعة دى امال انا اخدتكم مجاميع كبيرة ليه و من اولها كدة حدد الشاطرين من الخايبين ((سبحان الله)) و كل شوية يقولنا المجموعة اللى قبلكم احسن و انتم اوحش مجموعة و انتهت اول حصة و انا متدايقة جداً من المسيو

ثانى حصة...:
اول ما رحنا طبعا قعدنا نسمع تحريرى و كان السكرتير واقف علينا و بعد ما سمعنا نقلنا اللى على السابورة و احنا و لا فاهمين اللى بننقله و لا عارفين نقراه و انا اول ما دخلت لقيت المسيو بيضرب بعض التلاميذ اللى فى المجموعة اللى قبلنا و بعد كده دخلنا الاوضة و هو متنرفز و على آخره و طلعه علينا و يقول الكلمة و احنا مش عارفين ننطقها و يتنرفز علينا و كان ناقص يوميها يقولنا فى وشنا انتم حمير و مبتفهموش و الله كلامه كان يدل على كده
و كنا اخدنا فى الحصة دى كام جمله على حبة كلمات على اول عشر ارقام على شوية جرامير و هكذا خلصت الحصة الثانية

ثالث حصة...:
المسيو فيها كان مروق شوية و ماقعدش يعايرنا زى كل مرة اصل احنا كنا اول حصة عنده فكان باله رايق و انا كنت مروحة من الحصة دى مبسوطة شوية يعنى

رابع حصة...:
المسيو كان مدايق جداً منا و زعق فينا جامد و كمان اخرنا يجى ساعتين و ربع و المفروض ان احنا نقعد ساعة و نص لكن المسيو حب يكرمنا شوية و انا بقى يوميها روحت من الحصة دى و انا متنحة و يعتبر مش فاهمة كويس اللى اتشرح و انا فاكرة انى اما جيت اذاكر كنت عايزة اعيط علشان مش عارفة انطق كويس و احنا المفروض نحفظ بالنطق علشان هنسمع شفوى و تحريرى و انا هموت و اعرف النطق و غير شوية حاجات غلسة فى الجرامير كده و احنا نعتبر خلصنا فى الاربع حصص دول الارقام لغاية مليون و شوية جمل و الجمل اللى بتتقال فى الفصل و النكرة و المعرفة و فعل يكون و فعل يملك و طبعاً الضماير و صفات الاشارة و كما ن شوية كلمات يجى 40 او 50 كلمة يعنى فى الحدود دى او اكثر ده زائد العلامات كنا اخدنا علامتين العلامة الخطيرة و العلامة الحادة بس انا حاسة ان الحصة الرابعة دى المستر تقل علينا اوى فيها

خامس حصة...:
اما الحصة دى فانا هاموت و اعرف هما اخدم فيها ايه و دى كانت امبارح و مكنش ينفع اروح الحصة دى خالص و كنت تعبانا و سخنة و روحت من عند الدكتور بعد معاد الدرس بيجى ساعة طبعاً ماما اتصلت بالبيت و السكرتير هو اللى رد و اعتذرنا عن انى معرفتش آجى و لغاية دلوقتى معرفناش نكلم المسيو و بم انى معرفتش حد فى الدرس و لا معايا نمرة تليفون حد فمعرفش هما خادوا ايه فى اليوم ده و بكده يبقى راحتت عليا حصة و شرح حصة بحالها ربنا يستر

و بكده انا قولتلكم كل حاجة عن الفرنساوى من ساعت ما اخده و بجد حاسة ان هو صعب و مش عارفة اجمعه و مفيش حد فى البيت ينفع يساعدنى فى الفرنساوى و بما ان معظمكم بيقول ان الالمانى اسهل و بيضمن درجات و بيرفع المجموع فانا بفكر حالياً انى احول المانى و مش عارفة اعمل ايه و عايزاكم تنصحونى هو الالمانى هيكون احسن ليا و لا اكمل فرنساوى
معلش انا طولت عليكم بس ياريت ماتبخلوش عليا بالنصيحة