أنا مع البرادعى أنتم مع مين

[حميد بدوى]

أنا مع البرادعى أنتم مع مين
مع اللى حاكم البلد من تلاتين سنة
ولسة مش عارفين البلد رايحة فين
وكل اما حد يتكلم يقول اصلكم مستعجلين
مع اللى عمل البلد فريقين
فرقة كورة وفرقة فنانين
هما دول اللى عليهم العين
وكل منافق بيهتف بأسمه وحكمتة
وكأنه من المرسلين
وما اكتر المنافقين


اما الشعب يشرب المر يشوف الذل يشيل الطين
انا مع البرادعى فى كل كلامة
امال يضمن انتخابات نزيهة ازاى
وقبل الانتخابات عايزين يتغير الدستور
عايزين كل واحد فينا يكون له كلمة ودور
لحد امتى هتفضل العملية فى النملية
والديمقراطية فى البلد مجرد ديكور
ودلوقتى بيقولوا مش فاضين
احنا لسة معدلين


قصدهم لسه مفصلين
ولو هما عايزين حاجة تتعمل فى ساعتين
انا واحد من الناس عايز البرادعى لسببين
لانه بعيد عن العصابات وبعيد عن الفساد والمفسدين
بيقولوا من تلاتين سنة وهو برة بس صدقونى شايف مصر
اكتر من اللى جوة اللى جوة مضحوك عليهم ومفيش حاجة فى ايديهم
انا مع البرادعى ولازم كلنا نبقى معاة لانه بالعربى هو طوق النجاة بأذن الله
انا عارف ان الموضوع صعب بس كله على الله
يقولوا معاة جنسيتين يقولوا عميل
بيسودو صورته


ودة كله علشان مرعوبين
واسألوا الغاز اللى بيروح اسرائيل
وانتم هتعرفوا مين مع مين
واسألوا غزة اللى بتموت
والحدود اللى بتنضرب عمال على بطال
من غير سبب
هتقولوا طالب طلبات تعجيزية
يقدر اى حد ينجح غير جمال
طبعا نجاحة مش محتاج احتمال

وفى الاخر هيقولوا الريس ابن الريس
وابن الوز أكيد عوام مهى بقت بركة والسلام

والطبالين والزمارين والمنفاقين ورجال الدولة
وللاسف كمان بعض رجال الدين
ووكالات الاعلام المصرية والقناة الاولى والقناة التانية
تبث للشعب الغلبان ان الريس مبارك
جاب لمصر احلى هدية وهو طبعا ابنة جمال
وربنا يخلى العيال ويحفظ الجرائد الحكومية
واللى يقول مولود فى المطبخ السياسيى
واللى يقول شاب طموح


واللى يقول جمال فلتة زمانة والشعب لازم نحمدوا ربنا علية
ويبوسوا ايدية ورجلية
وكلام كدب وناس مصلحجية
مش عارف بس اقول اية
طالما كل حاجة فى مصر حلوة
البلد مبتقدمش خطوة لية؟؟


تعرفوا احنا اتقدمنا فى اية
فى التزوير والتعذيب والواسطة والمحسوبية
الاستبداد والفساد اللى بقى أكبر وأقوى مؤسسة قومية

الشاعر
عبد الحميد بدوى