فى بيتنا محمية طبيعية!

[راجى طاعة الرحمن]

السلام عليكم ورحمة الله وبركاته

دة أول موضوع ليا فى قسم النقاش الهادف وأتمنى يعجبكم

نبدأ بقى....

كل واحد منكم يتخيل معايا إن وهو قاعد كدة فى أمان ربنا لقى بومة داخلة عليه هايعمل إيه ساعتها؟

أنا بقى حصل لى الموقف دة أحكيلكم الحكاية ولاهأطول عليكم؟

أحكيها بالمرة وخلاص

أصل وإحنا قاعدين بنفطر فى يوم كنا سايبين الباب مفتوح(البيت بتاعنا لوحدنا) فسمعنا صوت خبط ورزع جااااامد كنا نحسبها قطة نازلة من فوق ولاحاجة أصل القطط قاعدة عندنا فوق ونفاجأ ببومة داخلة علينا وشها استغفر الله العظيم يارب طبعاً أنا اتلبشت فى بعضيا وخفت منها أول مرة تدخل عليا بومة! وبرغم إن البومة كانت بيضة إلا إن بياضها مخفاش كآبة وشها (استغفر الله العظيم يارب)


وطبعاً مقدرتش أمسك نفسى من التشاؤم ومقدرتش أمسك مشاعرى وخاصةً إن أنا دلوقتى مصدوم مع إنى شفت بومة قبل كدة بس أنا ساعتها اللى رحت لمكانها آخر ماكنت أتوقع إن البومة هى اللى تنزلى من فوق

وباينها كدة كانت نعسانة أو مش شايفة بسبب النور اللى كنا مشغلينه علشان كدة كانت بتدور على مكان عتمة وماارتاحتش غير لما حطينا عليها طبق كبير وبعد كدة طلعناها برة بعد عناء طويل

وطبعاً بعد اللى حصل دة حسيت لوهلة إن أنا عايش فى محمية طبيعية مش فى بيت وخاصةً إن بعديها دخلت علينا اليمامة اللى معششة عندنا من الباب برده فالواحد حس إنه لازم يكون معاه بندقية صيد تحسباً للظروف ليلاقى أسد داخل عليه ولا غراب يلبس فى وشه ولا خفاش يلزق فيه

المهم بعد المحمية اللى دخلنا فيها دى ودخلتكوا معايا قعدنا نتساهر فحكينا عن الناس ومعتقداتها الخرافية واستغربت لما سمعت الحاجات اللى هاقولها لكم دى

1- يقول لك طائر أبوقردان دة كان إنسان واتوضأ بلبن فربنا سخطه طائر!!!!!

2_ يقول لك إن السلحفاة دى كانت ست عندها طاحونة قمح فجت ست تستعير منها الطاحونة فالست رفضت فربنا سخطها سلحفاة واتحشرت الست دى بين قرصين الطاحونة فبقت بكدة سلحفاة

3_ يقول لك إن البومة دى كانت ست عينيها وحشة فربنا سخطها بومة ويقول لك لو دققت النظر فى وش البومة هاتلاحظ وش ست علشان كدة اللى بيحسد بنقول عليه بومة!

يعنى شفت خيالهم الواسع كان عامل إزاى!!!!!
أتمنى إن الموضوع يعجبكم